‘గాడ్జిల్లా: కింగ్ ఆఫ్ ది మాన్‌స్టర్స్‌’ ట్రైలర్‌ విడుదల

హాలీవుడ్ ప్రముఖ‌ నిర్మాణ సంస్థలు వార్నర్‌ బ్రదర్స్‌, లెజెండరీ పిక్చర్స్‌ సంయుక్తంగా నిర్మించిన ‘గాడ్జిల్లా’ (2014) సినిమా బాక్సాఫీసు వద్ద ఎంతటి విజయాన్ని సాధించిందో తెలిసిందే.‌ 160 మిలియన్‌ డాలర్ల (దాదాపు రూ.వెయ్యి కోట్లు)తో రూపొందించిన ఈ సినిమా ప్రపంచ వ్యాప్తంగా 529.1 మిలియన్‌ డాలర్లు (దాదాపు రూ.3637 కోట్లు) వసూలు చేసి కాసుల వర్షం కురిపించింది.

ఇప్పుడు దీనికి సీక్వెల్‌గా వస్తోన్న సినిమా ‘గాడ్జిల్లా: కింగ్ ఆఫ్ ది మాన్‌స్టర్స్‌’. గాడ్జిల్లా ఫ్రాంచైస్‌‌లో 35వ సినిమాగా వస్తోన్న ఈ చిత్రానికి మైఖెల్‌ డోగర్టి దర్శకత్వం వహిస్తున్నారు. కైరా చాండ్లర్‌, వెరా ఫార్మిగా, మిల్లీ బాబీ బ్రౌన్‌, బ్రాడ్లీ విట్‌ఫోర్డ్‌ తదితరులు ప్రధాన పాత్రలు పోషిస్తున్న ఈ సినిమా వచ్చే ఏడాది మే 31న విడుదల కాబోతోంది.

తాజాగా ఈ సినిమా ట్రైలర్‌-1ను విడుదల చేశారు. ఇది యూట్యూబ్‌లో విడుదలైన కొన్ని గంటల్లోనే 53 లక్షల వ్యూస్‌ను దక్కించుకోవడం విశేషం. ఈ నేపథ్యంలో సినిమాపై మంచి అంచనాలు నెలకొన్నాయి. ‘మన ప్రపంచం మారిపోయింది. భూమి అంతరించిపోతుందని మేం భయపడుతున్నాం. ఇప్పటికే అది ప్రారంభమైంది. దానికి మేమే కారణం.. మేమే ఆ ఇన్ఫెక్షన్..’ అనే మాటలతో ప్రారంభమైన ఈ ట్రైలర్‌ ఆసక్తికరంగా ఉంది. ఈ సినిమా ట్రైలర్‌లో గాడ్జిల్లా భారీగా, అతి భీకరంగా కనిపించింది.‌